Sare sozialek lagundu al dezakete GJHak lortzen?
Hedabide sozial horiek Garapen Jasangarrirako Helburuak (GJH) sustatzen eta lortzen betetzen duten funtsezko zeregina aztertuko dugu artikulu honetan.
Sare sozialak GJHetarako tresna gisa
Hedabide digital horiek mundu osoko milaka milioi pertsona konektatzen dituen plataforma global bihurtu dira. Horrela, interkonexio horrek aukera paregabea eskaintzen du Garapen Jasangarrirako Helburuei buruzko informazioa zabaltzeko eta beraien aldeko ekintza sustatzeko. Era berean, sare horiek egokiak dira bete beharreko helburu horiei buruzko kontzientziazioa areagotzeko.
Zer alderditan laguntzen diete sare sozialek GJHei?
Hezkuntza
Lortu beharreko erronkei eta helburuei buruzko informazioa parteka daiteke, mundu jasangarriagoa egiteko beharrizanari buruzko informazioa eman dakieke jarraitzaileei, etab. Horretarako, argitalpenak, infografiak eta informazio-bideoak erabil daitezke, besteak beste, garapen ekologikoaren helburuak modu erraz eta ulergarrian azaltzeko tresna indartsuak baitira.
Mobilizazioa eta aktibismoa mundu digitalean
Hedabide sozialek komunitatea GJHen alde mobilizatzea ere ahalbidetzen dute. Hashtag eta kanpaina biralek jendea inspiratu dezakete haien aldeko neurri zehatzak hartzera. Adibidez, #TrashTag kanpainak gune publikoak garbitzera bultzatzen du, eta 11. helburua (Hiri eta Komunitate Jasangarriak) eta 12. helburua (Ekoizpen eta Kontsumo Arduratsuak) lortzen laguntzen du.
Datuak eta estatistikak sortzea
Datuen jarraipena eta sorkuntza ezinbestekoak dira garapen jasangarrirako jomugetarantz egindako aurrerapena kuantifikatzeko. Horrela, hedabide sozial digitalek datu- eta informazio-iturri baliotsua ematen dute denbora errealean aipatutako helburuekin lotutako gaiei buruz.
Sareetako joeren eta elkarrizketen azterketak gizartearen kezkei buruzko informazioa eman dezake, eta erakundeei beren estrategiak egokitzen lagun diezaieke.
Lankidetza eta aliantzak
Sare sozialek aliantzak eta lankidetzak sortzen laguntzen dute. Hainbat erakundek, gureak (BBK Kunak) barne, indarrak batu ditzakete helburu jasangarrietan ardaztutako kanpaina eta proiektuetan.
Lineako lankidetza bereziki eraginkorra izan daiteke helburu komunak lortzeko, hala nola genero-berdintasuna sustatzea (5. helburua) edo gosearen aurkako borroka (2. helburua).
Zelan lagundu sareen bidez helburu jasangarriei
Online sare horietako jarduerak jomuga jasangarriei hainbat modutan lagun diezaieke.
Hona hemen plataforma horien bidez partekatu eta eskain daitekeenari buruzko ideia batzuk:
- Hezkuntza- eta kontzientziazio-informazioa. Helburuei buruzko datuak eta istorioak partekatzea, horien garrantzia azalduz, baita ere gizabanakoaren ekintzek zelan ezarri dezaketen aldea edo desberdintasuna.
- Erronka eta kanpaina biralak. Helburu berdeekin lotutako ekintza espezifikoak sustatzen dituzten erronka eta kanpaina biralak sortzea. Erabiltzaileei erronka jo dakieke zuhaitzak landatzeko, hondakinak murrizteko edo komunitate behartsuei laguntzeko.
- Arrakasta-istorioak. GJHekin lotutako proiektuen historiak partekatzea, komunitatea helburu komun baten inguruan batzen denean lor daitekeen eragin positiboa erakutsiz.
- Zuzeneko ekitaldiak eta webinar-ak. Zuzeneko ekitaldiak eta lineako hitzaldiak antolatzea, helburuei buruzko gai espezifikoak lantzeko eta galderak egin eta aktiboki parte hartzeko aukera emateko entzuleei.
Ikusten duzunez, sare sozialek GJHen sustapenean duten boterea ukaezina da. Espero dugu artikulu hau baliagarria izatea herritarrak kontzientzia daitezen ahalmen digital hori baliatu behar dugula mundu jasangarri bat lortzera gehiago hurbiltzeko. Gogoratu, hedabide sozialak zuzen erabiltzen ditugunean, aldaketa positiborako eta garapen jasangarrirako helburuak lortzeko indar katalizatzailea izan daitezkeela.