![turismoregenerativo](https://kuna.bbk.eus/wp-content/uploads/2024/06/turismoregenerativo.jpg)
Turismo birsortzailea: bidaiatzeko eta mundua ezagutzeko modu jasangarria
Uda iritsi da, eta horrekin batera bidaiatzeko eta leku berriak ezagutzeko gogoa. Hala ere, planeta zaintzeko beharraz gero eta kontzienteago den mundu honetan, galdera bat sortzen da: zelan bidaiatu dezakegu modu arduratsu eta jasangarrian? Turismo birsortzailea da erantzuna, bisitatzen ditugun helmuga edo destinoetan eragin positiboa utzi nahi duen bidaia-filosofia baita.
Zer da turismo birsortzailea?
Turismo tradizionalean ez bezala, askotan baliabideen kontsumo masiboan eta lekuen ustiapenean oinarritzen baita, turismo birsortzailearen oinarria bidaiariei, tokiko komunitateei eta ingurumenari mesede egiten dieten esperientziak sortzea da. Helburua da modu kontzientean bidaiatzea, tokiko kultura eta tradizioak errespetatuz, eta helmugen garapen jasangarrian lagunduz.
Zeintzuk dira turismo birsortzailearen printzipioak?
Turismo birsortzailearen printzipioak funtsezko hiru zutabetan oinarritzen dira:
- Errespetua: Tokiko kultura, tradizioak eta ingurumena errespetatzea.
- Kontserbazioa: Baliabide naturalak babestea eta biodibertsitatea kontserbatzen laguntzea.
- Komunitatea: Tokiko komunitateen garapen ekonomiko eta sozialean laguntzea.
Zelan praktika dezakegu turismo birsortzailea?
Gure oporrak planifikatzeko garaian, turismo birsortzailea praktikatzeko hainbat aholku jarrai ditzakegu:
- Destino jasangarriak aukeratzea: ingurumenaren kontserbazioarekin eta garapen jasangarriarekin konprometituta dauden destinoak aukeratzea.
- Eco-friendly ostatuetan ostatu hartzea: praktika jasangarriak ezartzen dituzten hotelak, ostatuak edo landetxeak aukeratzea, energia eta ura aurreztea, produktu ekologikoak erabiltzea eta tokiko ekonomiari laguntzea, besteak beste.
- Tokiko produktuak kontsumitzea: tokiko gastronomia dastatzea, artisau-produktuak erostea eta tokiko turismo-zerbitzuak kontratatzea.
- Ingurumena errespetatzea: naturan hondakinik ez uztea, garraio jasangarria erabiltzea eta uraren eta energiaren kontsumoan arduratsu jokatzea.
- Tokiko ekimenak bultzatzea: ingurumena kontserbatzeko proiektuetan parte hartzea, garapen jasangarriaren alde lan egiten duten tokiko erakundeei laguntzea edo ongintzazko kausei dohaintzak ematea.
Zeintzuk dira turismo birsortzailearen onurak?
Turismo birsortzaileak hainbat onura eskaintzen ditu bidaiarientzat eta helmugentzat:
- Bidaiarientzat: esperientzia benetakoago eta aberasgarriagoez gozatzeko, tokiko komunitateekin konektatzeko eta planeta babesten laguntzeko aukera ematen du.
- Helmuga edo destinoentzat: garapen jasangarria sustatzen du, aukera ekonomikoak sortzen ditu tokiko komunitateentzat eta ingurumena babesten du.
Turismo birsortzailea, aukera bat Bizkaiarentzat
Turismo birsortzailea ez da joera global bat bakarrik, Bizkaiarentzat kalitatezko helmuga turistiko jasangarri gisa kokatzeko aukera bat ere bada. Bisitariei zein tokiko komunitateei mesede egingo dien eredu turistiko baten aldeko apustua da, aldi berean gure herrialdearen aberastasun naturala eta kulturala zainduz.
Turismo birsortzailea bidaiatzeko modu bat da, munduaz modu arduratsu eta jasangarrian gozatzeko aukera ematen diguna. Modu birsortzailean bidaiatzea aukeratzen dugunean, gure planetarentzat eta datozen belaunaldientzat etorkizun hobea eraikitzen lagundu dezakegu.
Eta zu? Prest zaude bidaiari birsortzaile bihurtzeko?