Gizarte-ekintzailetza: inspirazioa eta aholkuak Bizkaiko ekintzaileentzat

Etengabe eraldatzen ari den mundu honetan, gizarte-ekintzailetza tresna ahaltsua da gizarte- eta ingurumen-erronkei ikuspegi berritzaile batetik heltzeko.

Bizkaian, tradizioan, sormenean eta herritarren konpromisoan aberatsa den lurraldean, gero eta pertsona gehiago ari dira eragin positiboko ekintzailetzaren alde egiten.
Joera horrekin bat egitea pentsatzen ari zara? Hemen inspirazioa eskaintzen dizugu, baita lehen urratsak egiteko funtsezko aholkuak ere.

Zer da gizarte-ekintzailetza?

Gizarte-ekintzailetzak mundua eraldatzeko grina eta hori jasangarria izateko enpresa-ikuspegia uztartzen ditu.

Gizarte-ekintzaileek irtenbide berritzaileak bilatzen dituzte, besteak beste, gizarteratzea, ingurumenaren zaintza, hezkuntza edo aukera-berdintasuna bezalako arazoei heltzeko, inpaktu positiboa eta balio ekonomikoa sorraraziz.

Inspirazio-istorioak Bizkaian

Bizkaian badira gizarte-ekintzailetzaren boterea erakusten duten adibideak:

1. Ekonopoloa: ekonomia zirkularreko gune bat, non baliabideak berriz erabiltzea eta lankidetza komunitarioa bultzatzen diren.

2. Koopera: laneratzeko proiektu bat, birziklatzea eta zaurgarritasun-egoeran dauden pertsonentzako enplegua sortzea uztartzen dituena.

3. EDE fundazioa: Gizarte-proiektu berritzaileen bidez gizarteratzea eta komunitate-sarea indartzea sustatzen duen erakundea.

Proiektu horiek adibide batzuk baino ez dira, lurraldetik eragin positiboa zelan sor daitekeen erakusten dutenak. Horietako bakoitzak ikuspegi argia, eredu jasangarria eta komunitatearen beharrizanekiko lotura zuzena uztartzen ditu.

Bizkaiko gizarte-ekintzaileentzako aholkuak

Gizarte-ekintzailetzako proiektu bihur daitekeen ideia bat baldin baduzu, aholku hauek aurrera egiten lagunduko dizute:

1. Identifikatu tokiko erronka bat: behatu zure inguruneari eta antzeman arazoak, irtenbideak bilatzera motibatuko zaituztenak. Gizarte-ekintzailetzaren arrakasta komunitatearen benetako beharrizanekin lotuta dago.

2. Zehaztu zure eragina: onura ekonomikoez haratago, hausnartu zer aldaketa positibo sortu nahi duzun eta zelan neurtuko duzun eragin hori.

3. Ikasi besteengandik: konektatu Bizkaiko eta urrunagoko gizarte-ekintzaileekin. Esperientziak eta ikaskuntzak partekatzea funtsezkoa izan daiteke oztopoak gainditzeko eta aliatuak aurkitzeko.

4. Bilatu laguntza: Bizkaian badira baliabideak ―BBK Kuna, proiektuen inkubagailuak, prestakuntzak eta laguntza-sareak― zure ideia garatzen lagun diezazuketenak.

5. Egizu iraunkortasun edo jasangarritasunaren aldeko apustua: diseinatu negozio-eredu bat, diru-sarrera errepikariak bermatu eta zure proiektua haztea eta epe luzera mantentzea ahalbidetuko dizuna.

6. Inplikarazi komunitatea: entzun eragin nahi diezun pertsonei, eta egin itzazu prozesuan partaide. Lankidetza gizarte-ekintzailetzaren funtsezko zutabea da.

Funtsezko baliabideak Bizkaian

Gizarte-ekintzaileei bidea erraztu diezaieketen ekimen ugari daude gure lurraldean:

– BBK Kuna: eragina duten proiektuak bultzatzen dituen gizarte-berrikuntzako laborategia.

– CEBEK Emprende: ekintzaile berrientzako aholkularitza eta prestakuntza eskaintzen ditu.

– Seed Capital Bizkaia: proiektu berritzaileentzako finantza-laguntza.

– Tokiko lankidetza-sareak: elkarteak eta coworking-guneak, beste ekintzaile batzuekin konektatzeko.

Etorkizuna eraikitzen Bizkaitik

Gizarte-ekintzailetzak, komunitateak eraldatzeaz gain, kide izatearen zentzua eta lurraldearekiko konpromisoa ere indartzen ditu. Ideia bat baduzu, hauxe da jauzia egiteko unea. Bizkaian, aukera edo abaguneak eskura dituzu, eta ez zaizu faltako zure ikuspegia errealitate bihurtzeko laguntza.

Ausartu munduan ikusi gura duzun aldaketaren buru izatera!