Bizkaiko elikagai enpresek 2030era bidaiatu dute AArekin duten etorkizuna aurreratzeko, ProtopIAren bigarren topaketan
BBK Kuna-k berriro bildu zituen enpresak, funtsezko eragileak eta jakin-nahi handiko pertsonak ProtopIAren bigarren saioan, non adimen artifizial sortzailea izan baitzen protagonista nagusia. Bizkaiko elikadura-sektorearen etorkizunaz kolektiboki hausnartzeko, aurrea hartzeko eta eraikitzeko jardunaldia izan zen.
Joan den irailaren 30ean, BBK Kuna askotariko ahotsen topagunea izan zen, guztiak ere helburu komun batekin konprometituak: adimen artifizialak Bizkaiko elikadura-enpresetan duen benetako eragina eta erronkak aztertzea. ProtopIAren bigarren saio hau, Innubarekin batera bultzatua, laborategi bizi gisa diseinatu zen, elkarrizketara, irudimenera eta ekintzara irekia.
Ikasteko, partekatzeko eta baterako sorkuntzarako topaketa
Adimen Artifiziala jada hemen dago eta abiadura handian doa aurrera, negozio-ereduak, prozesuak eta lanbideak eraldatuz. Zelan gidatu dezakegu eraldaketa hori, eta ez soilik horretara egokitu? Galdera horrekin abiatu zen Futurathoia: teknologiatik haratago begiratzeko eta edozein aldaketaren funtsezko faktoreari ‒pertsonei‒ erantzuteko pentsatutako dinamika parte-hartzailea.
“Erakunde areagotuen” kontzeptuari buruz David Alayón-ek (Innuba) emandako hitzaldi inspiratzailearen ostean, eta Gorka García Landak (BAIC) AAren erronkak eta aukerak Euskadin kokatuz emandako hitzaldiaren ondoren, talde-ekintzara igaro ginen. Talde bakoitzak “Etorkizunaren kartak” metodologiarekin lan egin zuen, 2030ean sektorea zelakoa izango den irudikatzeko. Parte-hartzaileek agertokiak proiektatu zituzten, edo aukerak identifikatu zituzten, baita AAri lotutako dilema etiko eta humanoak ere: algoritmoen gardentasuna, erabaki gizatiarrak hartzearen balioa, “soft skill”en garrantzia edo bakartzearen eragina eraginkortasun indibidualaren aurrean.
Saioaren laburpen-bideoa
Etorkizuna aktibatzeko gogoetak eta ikaskuntzak
Jardunalditik ondorio eta galdera indartsuak atera ziren, jarraitu beharreko bidea markatzen dutenak:
Erronka etiko eta gizatiarra: AAk jasangarritasunaren eta aurrerapen ekonomikoaren aliatua izan behar du, baina baita pertsonen ongizatearen aliatua ere. Enpresek gardentasunaren garrantzia nabarmendu zuten algoritmoen funtzionamenduan, giza irizpidea eta antolamendu-balioak zaindu beharra eta erabakiak hartzerakoan erantzukizun partekatua.
Giltza lankidetzan dago: inork ez ditu erantzun guztiak; horregatik, sorkuntza kolektiboa funtsezkoa da gune horietan. Elkarrekin ikasi genuen balio bereizgarririk handiena adimen kolektiboa eta giza konexioa izango direla gerora ere, baita ingurune automatizatuetan ere.
Aldaketarako prestatzea: kontua ez da soilik prestakuntza teknikoa, baizik eta gaitasun berriak eta etengabeko ikaskuntzaren kultura bultzatzea, non AA “eskatzen jakiteak” eta “orkestratzen jakiteak” ohiko “egiten jakiteak” duen pisu bera izango duen. Belaunaldien arteko arrakala eta talentuaren kudeaketa benetako erronkak dira, eta epe luzerako ikuspegia eskatzen dute.
Bizkairako etorkizun inspiratzaileak aktibatzea
ProtopIAren bigarren saio honek berretsi zuen etorkizuna ez dagoela idatzita: guztion artean eraikitzen dugu, lankidetzaren, sormenaren eta berritzeko borondatearen bidez, batez ere gizatiarra den hori ahaztu barik.
BBK Kunan topaketa, elkarrizketa eta esperimentaziorako guneak bultzatzen jarraituko dugu, sinetsita baikaude eraldaketa teknologikoa partekatua, inklusiboa eta iraunkorra baldin bada bakarrik izango dela sozialki baliotsua.
Zure ahotsa eta ikuspegia gehitu nahi zenituzke hurrengo saiora? Datorren urriaren 30an egingo dugu aurtengo hirugarren eta azken saioa.
Hemen eman dezakezu izena.
Zure zain gaude Bizkairako etorkizun inspiratzaileak aktibatzen jarraitzeko!